Noticias

• 24 de octubre de 2021

1.000 pertsona baino gehiagok parte hartu dute, aurrez aurre eta online, EUSKALITek Bilbon urriaren 20an eta 21ean antolatu zuen Kudeaketa Aurreratuaren Biltzarrean. Guztira 12 erakundek partekatu dituzte eraldaketa digitalari eta lan egiteko modu berriei buruzko praktika onak eta ikaskuntzak, kasuak eta hausnarketak, Kongresu honen ardatz nagusietako bi.

Arantxa Tapiak, Eusko Jaurlaritzako Ekonomiaren Garapen, Jasangarritasun eta Ingurumen Sailburuak, Kongresua inauguratu zuen, gogoraraziz Kudeaketa Aurreratua ez dela berez helburua, baizik eta erakundeen helburuak lortzeko bitartekoa. Tapiak azpimarratu zuen "beharrezkoa dela euskal produkzio-sare osoan Kudeaketa Aurreratuarekiko konpromisoa partekatzea, ezin baitugu enpresa bat bera ere atzean utzi berreskurapen eta eraldaketa garai honetan".

Kongresuaren hasierako hitzaldia Marc Vidalek egin zuen, Eraldaketa Digitalean eta 4.0 Industrian aditua eta Forbeseko Top 100 Influencers-eko kideetako batek. "Gizateriaren Historiaren testuinguruan, inoiz ez da hainbeste berrikuntza hain azkar gertatu. Datozen urteetako etorkizuna hurrengo 18 hilabeteetan hartuko ditugun erabakien araberakoa izango da", azpimarratu zuen. Vidalen arabera, "erakunde baten esparru guztiak daude interpelatuta eraldaketa horretan, uste ohi ez den bezala, aurrean dugun aldaketa teknologiatik haratago doalako. Digitalizatzeak teknologia bereganatzea dakar, baina eraldaketa digitalak egiteko modu guztiak goitik behera berrikustea ekarri behar du". Era berean, desikastearen, pentsamendu kritikoa garatzearen eta modu malguan kudeatzearen garrantzia nabarmendu zuen, eta gure gizartearen fase industrialaren oinarri izan den kontratu soziala berritzearen alde egin zuen, egungo aro digitalera egokitzeko.

Hain zuzen ere, lan-harremanen esparru berri horren oinarriak Kongresuaren bigarren eguneko hitzaldiak izan ziren, Alfonso Gurpegui Ruiz, Enplegu eta Gizarteratze sailburuordearen hitzaldiarekin hasi zena. Aurkezpenean, Gurpeguik 2020 – 2030erako Enpleguaren Euskal Estrategia hedatzeko ibilbide-orria azaldu zuen. Maiatzean aurkeztu zen, eta Enpleguaren Euskal Legean islatuko da. "Datorren urtean aurkeztuko da Legebiltzarrean. Gure sistemak aukera handiak ditu, baina koordinazioan eta eguneratzean aurrera egin behar dugu, enplegurako baldintzarik onenak ziurtatzeko, pertsonen gaitasunetatik eta erakundeen baldintzetatik abiatuta. Elkarrekin egindako lana da, eta elkarrekin landu behar dugu", nabarmendu zuen.

Enpleguaren etorkizuna: zalantzazko testuinguru batean aldaketei aurrea hartzea

Lanaren etorkizunari buruzko solasaldian, Susana Francok, Orkestrako Ikertzaile Seniorrak, Ibon Zugastik, Prospektikerreko zuzendariak eta Carlos Peredak, Confebaskeko enplegu-arduradunak. Euskadiko enpleguaren profila eta bilakaera aztertu zituzten, eta gaur egun era guztietako erakundeen martxa egokia baldintzatzen duten gapei buruz eztabaidatu zuten. Hiru ikuspegietatik, kritikotzat jo ziren enplegu-nitxo berrietan emakumeen enplegagarritasun-arrakalak, teknologiari oso lotuta baitaude, eta oraindik ere haien parte-hartzea ez baita nahikoa. Era berean, belaunaldi gazteenei egiten zaien eskaintza zalantzan jartzera gonbidatu zituzten erakunde guztiak; izan ere, soldata funtsezko irizpidea izaten jarraitzen badu ere, dagoeneko ez da gazteak enpresa-proiektu batean sartzea baldintzatzen duen bakarra.

Eraldaketa digitala eta pertsonen kudeaketa: ikaskuntza gurutzatuak

Biltzarraren bi jardunaldietan, 12 erakundek partekatu zituzten eraldaketa digitalari eta pertsonen eta taldeen garapenera bideratutako ekimenei buruzko ikaskuntzak eta jardunbide egokiak.

Teknologiaren erabilerari eta 4.0 bilakaerari lotutako jardunbide egokien adibideen artean, honako hauek aurkeztu ziren: ekoizpen-prozesuetan datuak aprobetxatzeko Bikairen kasuak; zerbitzu aurreratuen egokitzapen teknologikoa, Ekonomisten Euskal Elkargoarekin; IMQ eta Profesionals for Quality (P4Q) enpresen bezeroei zuzendutako eraldaketa digitalerako estrategia; eta pandemiaren kudeaketa-testuinguruan egokitzapen teknologikorako UPV/EHUren eta Lantegi Batuak-en proiektuak.

Bestalde, Másfamilia Fundazioak erakundeetan kontziliazioa kudeatzeko metodologia azaldu zuen, eta Artadi, okindegi industrialeko enpresak bere taldeak kudeatzeko Belbin metodologia aplikatzeko prozesua berrikusi zuen. Amaitzeko, El Regato Ikastetxeak, Ibermaticak, Spri Taldeak eta Babesten Gipuzkoak, pandemiaren testuinguruan talde profesionalen motibazioa, parte-hartzea eta baldintzen hobekuntza kudeatzeko abian jarri zituzten taldeen kudeaketa-proiektuen emaitzak azaldu ziren.

• Biltzarraren edukia gure Youtubeko kanalean ikusi dezakezu (Marc Vidalen hitzaldia izan ezik)

• Aurkezpen guztiak Kudeatu eta bilatu erremintan

• Kongresuaren argazkiak hemen